އިދްރީސް ތައުފީގު އިސްލާމްވީ ގޮތް

 

               އިދްރީސް ތައުފީގު އިސްލާމްވީ ގޮތް

              އިސްލާމްދީނާ ގާތަށް އަހަރެން ގެންދިޔައީ އަހަރެން ބެލި ދަރުހަކުން، ނުވަތަ މުސްލިމަކާ އޮތް ރަހުމްތެރިކަމެއްގެ ސަބަބަކުން ނޫނީ އިސްލާމީ ޚަލަގާއަކުން ވެސް ނޫނެވެ. އެ ދީނަށް އަހަރެންނަށް ވަދެވުމުގެ އަސްލަކަށްވީ ދުވާރުމަތީ ބޫޓު ސާފުކުރަން އިން ކުޑަކުއްޖެކެވެ. އަހަރެންނާއި އަނބިމީހާ އެއްއަދުވަހު އޭނާ ބޫޓު ސާފުކުރަން އިން ދުވާރުމަތިން ދަނިކޮށް އަހަރުމެންގެ ހުދުހަން އޭނާއަށް ފާހަގަވިއެވެ. އޭނާއިނީ ވަރަށް ހިކިކޮށް އަނަރޫފަވެ،ކަޅުވެފައެވެ. އަހަރުމެން ފެނުމުން އޭނާގެ މޫނުމައްޗަށް އުޖާލާކަމެއް އައިކަހަލައެވެ. އަދި އަހަރުމެންނަށް ބުންޏެވެ. "އައްސަލާމު ޢަލައިކުމް (ތިބާއަށް ސަލާމަތްކަން ހުރި)" އެވެ. އޭނާ ހިތުގެ އަޑިން އެހެންބުނިކަން އަހަންނަށް އިޙްސާސް ކުރެވުނެވެ. މިސްރުގައި އަހަރުމެން ހޭދަކުރި ދުވަސް ތަކުގައި ކޮންމެ ދުވަހަކު ވެސް އޭނާ އިންނަ މަގުން އަހަރެމެން ހިނގަމުއެވެ. އަދި ކުދިކުދި އެއްޗެހި އަރަބިން ބުނަން ދަސްކޮށް އެކުއްޖާއަށް މުޚާޠަބުކުރަމުއެވެ. ޙާލު ކިހިނެއް ހެއްޔޭ އެހިނަމަ އަލްހަމްދުލިއްލާހި! ވަރަށް ރަނގަޅޭ ބުނާނެއެވެ.

              އަހަރެންނަށް އިސްލާމްދީން ތަޢާރަފުކޮށްދިނީ އެތުއްތު ކުއްޖާގެ ސަލާމައި އެއިން ހިތައް ވެރިވި ހިތްހަމަޖެހުމެވެ. އެއް ހަފްތާއަށްފަހު ކެއިރޯއިން އަހަރެން ފުރައިގެން ދިޔައިރު އަހަންނަކަށް އަސްލާމްދީނެއް ނޭނގެއެވެ. އެކަމަކު މުސްލިމުންނަކީ މީޑިއާ އެދައްކާ ކަހަލަ ނުބައި ޖާހިލު ބައެއް ނޫންކަން ހަމަޔަގީނުން ވެސް އަހަންނަށް އެނގެއެވެ. ރަށަށް ދިޔަތަނާހެން ރަށުން (އެމެރިކާއިން) އަހަންނަށް ޓީޗަރެއްގެ ވަޒީފާ ލިބުނެވެ. އެ ވަޒީފާ ލިބުނީ ރަށުގެ ކުޑަކުޑަ ޕަބްލިކް ސްކޫލަކުންނެވެ. އެތާނގައި އޭރު ތަޢުލީމު ހާސިލްކުރަމުން ދިޔައީ ވަރަށް ވިޔާނުދާ އުޅުމެއް ނެތް ކުދިންތަކެކެވެ. ވަރަށް ވިޔާނުދާ ނުލަފާ އުޅުމެއް ހުރި ކުދިންތަކެކެވެ. ނަމަވެސް އެތަނުގައި އެތަނުން ތަޢުލީމު އުނގެނެމުންދާ ޢަރަބި ކުދިންތަކެއް ވެސް އުޅެއެވެ. އެއީ ވެސް ޢަރަބި މުސްލިމް ކުދިންތަކެވެ. އަހަރެންނަށް ކިޔަވާދޭން ޖެހުނީ ދުނިޔޭގައި އެންމެ ބާރަށް ފެތުރެމުން އައި 6 ދީނާއި ބެހޭގޮތުންނެވެ. އަހަރެންނަށް އެނގޭ ދެ ދީނަކީ ހަމައެކަނި ކްރިސްޓިއަނިޓީ އާއި ޖުޑައިޒަމްއެވެ. ދެން ހުރި 4 ދީން ނޭނގި އެކުދިން ފަހު އިމްތިހާނަށް ތައްޔާރުކުރާނެ ގޮތެއް ނެތެވެ. އެހެންވެ ފޮތްތައް ނަގައިން އެދީންތައް ވެސް އުނގެނެން ފެށީމެވެ. އެ ހަތަރު ދީނުގެ ތެރޭގައި އިސްލާމްދީން ވެސް ހިމެނެއެވެ. އެގޮތަށް 3 ނުވަތަ 4 މަސް ފާއިތުވެ ދިޔަ ފަހުން ރަސޫލާ ޞައްލަﷲ ޢަލައިހި ވަސައްލަމަގެ ނަންފުޅު ގަންނަ ކޮންމެ ފަހަރަކު އަހަރެންނަށް ( ނަފްސަށް ) ނޭނގި އަހަރެންގެ ލޮލުން ކަރުނަ އާދެއެވެ. އަދި ދެރަވެގެން ގޮސް ބައެއް ފަހަރަށް އަރުބެދޭހެން ހެންވެސް ހީވެއެވެ. ނަމަވެސް އެކުދިން ޖާހިލުކަމުން އަހަންނަށް އިހުސާސްތައް ފޮރުވާ އެއިން އެއްކިބާވާން މަޖުބޫރުވިއެވެ.

              މިހެން ދުވަސްތައް ފާއިތުވަމުން ގޮސް ރަމަޟާން މަސް އައިސް ބައްދަލުކުރިއެވެ. އެއްކަލަ މުސްލިމު ކިޔަވާކުދިން އަހަރެން ގާތަށް އައިސް ބުންޏެވެ. މުޅި ސްކޫލުން ވެސް ކާޕެޓު އަޅާފައި އޮންނަނީ ސާރގެ ކުލާހުގައި އެކަންޏެވެ. އަދި މޫނު ދޮންނަ ތަށި ވެސް ސާރަގެ ކުލާހުގައި އެބައިނެވެ. އެހެންވީމާ ބަންގި ގޮވީމާ މިތާނގައި ނަމާދު ކުރުމުގެ ހުއްދަ އަކަށް އެދެމެވެ. މިއީ ހަމައެދުވަސްވަރާ ދިމާކޮށް ﷲ މެދުވެރިކުރެއްވި ގޮތެވެ. ރޯދަމަސް ފެށުމާއެކު އެކުދިން ކޮންމެ ނަމާދު ގަޑިއަކު ނަމާދަށް އާދެއެވެ. އެންމެ ފުރަތަމަ އެމީހުންގެ ނަމާދާމެދު އަހަރެން އަޅާނުލަމެވެ. އަހަރެން އިންނާނީ ގިނައިން ފޮތްތައް މާކުކުރަން ނޫނީ ވޯކްޝީޓް ތައްޔާރު ކުރުމުގައި އަވަދިނެތިއެވެ.  ނަމަވެސް ފަހުން ފަހުން އައިސް އެ ކުދިންގެ ނަމާދު އޮބްޒާވުކުރާހިތްވިއެވެ. ފާހަގަވާން ފެށީ ސަޖިދައަށް ދާކަމެވެ. ރުކޫޢު ކުރާކަމެވެ. އެހިސާބުން އިންޓަނެޓަށް ވަދެ ހޯދަން ފެށީމެވެ. ނަމާދުގައި ކިޔާ އާޔަތްތައް ދަސްކޮށް ރޯދަނިމުނުއިރު އެކުދިންނާއެކު ނަމާދުކޮށް ނަމާދުކުރަން ދަސްވެ ރޯދަވެސް ހިފަން ފެށީމެވެ. އޭރު އަހަރެން އެކަން ކުރީ ﷲ އަށް ޓަކައެއް ޏުނެވެ. އެކުދިންނަށް ހިތްވަރު ދިނުމަށްޓަކައެވެ.

              ރޯދަމަސް ނިމުނުތަނާ އަހަރެން ދާންޖެގހުނީ ލަންޑަންގެ މިސްކިތަކަށެވެ. އެތަނުން އަހަންނާ ޔޫސުފް އިސްލާމްއާ ދިމާވިއެވެ. އޭނަގެ ދަރުހެއް ނިމުމުން އޭނަ ގާތަށް ގޮސް މުސްލިމަކަށް ވެވޭނީ ކިހިނެއް ހެއްޔޭ އެހީމެވެ. އޭނާ ބުންޏެވެ. މުސްލިމުން ގަބޫލުކުރާނީ އެންމެ ކަލެކެވެ. އަހަރެން އޭނާއަށް ބުނީމެވެ. މިއޮތް ހުރިހާ ދުވަހު ވެސް އަހަރެން ގަބޫލުކުރީ އެންމެ އިލާހެކެވެ. އެންމެ ކަލެކެވެ. އެހިސާބުން ޔޫސުފް އަހަންނަށް ބުންޏެވެ. އެހެންވެއްޖެނަމަ ފަސް ވަގުތު ނަމާދުކުރާށެވެ. އަހަރެން ނަމާދުކުރާ ވާހަކަ ވެސް ބުނީމެވެ. އެހެންނަމަ ރޯދަ ހިފަން ޔޫސުފް އަހަރެން ގާތުން އެދުނެވެ. އަހަރެން ރޯދަހިފާ ވާހަކަ ވެސް ބުނީމެވެ. އެއަޑު އަހާފައި އޭނާ ހައިރާންވިއެވެ. ހައިރާންވެފައިހުރެ އެނާ ބުންނެވެ. "ކާކަށް އޮޅުވާލަން ތި އުޅެނީ؟ ތި ބުނި ކަންތައް ކުރާނަމަ ތިއީ މިހާރު ވެސް މުސްލިމެއް ނޫން؟" އެހެން ބުނިތަނާ މަޣްރިބު ނަމާދަށް ބަންގި ގޮވިއެވެ.

              އެވަގުތު އަހަންނަށް އިހްސާސްވިއެވމިހުރިހައި ކަމަކުން އަހަރެން ތައްޔާރުކުރީ މިވަގުތަށެވެ. އަހަރެން ކަންފަތުގައި އޭނާބުނި ޖުމްލަ ގުގުމަމުން ދިޔައެވެ. އެންމެން ސަފުހަދާ ނަމާދު ކުރަން ފެށިހިނދު މަލާއިކަތުން އެތަނަށް ހާޒިރުވެ އެތަން ފުރާލިކަމުގެ އިޙްސާސް އަހަރެންގެ ހިތަށްކުރިއެވެ. އަދި ގުރުއާން ކިޔަވަމުން ދިޔައިރު ހުއްޓުމެއްނެތި ރޮވުނެވެ. އެ ނަމާދަށް ފަހު އިސްލާމްވީމެވެ. ޝަޙާދަތް ލައި ދިނީ ޔޫސުފް އިސްލާމެވެ.

މަސްދަރު : އިންޓަވިއު/ބިލީވާރަސް ވޮއިސް އިން ނެގި ތަރުޖަމާކުރެވިފައި